உலகில் நாம் கேள்விப்படும் சில உயிரினங்கள் உண்மையிலேயே வாழ்ந்தவை, ஆனால் சில மனிதர்களின் கற்பனையால் உருவானவை. இவற்றை பிரித்து அறிவது மிகவும் சுவாரசியமானது.

பிஜி கடல் கன்னி (Fiji Mermaid) – கற்பனை

கடல் கன்னிகள் பற்றிய கதைகள் பல இருந்தாலும், 1842-ல் காட்சிப்படுத்தப்பட்ட ‘பிஜி கடல் கன்னி’ என்பது ஒரு ஏமாற்று வேலை. ஒரு குரங்கின் உடலையும் மீனின் வால் பகுதியையும் இணைத்து தையல் போட்டு உருவாக்கப்பட்ட ஒரு பொம்மையையே மக்கள் உண்மை என்று நம்பினர். இது ஒரு வெறும் கற்பனையே தவிர நிஜம் அல்ல.

ராட்சத தவளை (Devil Frog) – உண்மை

சுமார் 66 மில்லியன் ஆண்டுகளுக்கு முன்பு டைனோசர்கள் வாழ்ந்த காலத்தில், ஒரு பெரிய கால்பந்தாட்டப் பந்து அளவுள்ள தவளைகள் வாழ்ந்தன. இவை சிறிய டைனோசர்கள் மற்றும் பாம்புகளைக் கூட வேட்டையாடி உண்ணும் பலம் கொண்டவை. இவை மடகாஸ்கர் தீவில் வாழ்ந்ததற்கான ஆதாரங்கள் கிடைத்துள்ளன. இது ஒரு உண்மையான உயிரினம்.

ஜக்கலோப் (Jackalope) – கற்பனை:

முயலுக்கு மானின் கொம்புகள் முளைத்திருந்தால் எப்படி இருக்கும்? அதுதான் ஜக்கலோப். அமெரிக்காவின் சில பகுதிகளில் இன்றும் இது பற்றி பேசப்பட்டாலும், இது ஒரு வேடிக்கையான கற்பனை மட்டுமே. மானின் கொம்புகளை முயல் தலையில் வைத்து தைக்கப்பட்ட உருவங்களை வைத்தே இந்தக் கதைகள் பரவின

வளையப் பாம்பு (Hoop Snake) – கற்பனை:

பாம்பு தனது வாலை வாயால் கவ்விக்கொண்டு ஒரு சக்கரம் போல உருண்டு ஓடும் என்று ஆஸ்திரேலியாவில் கதைகள் உள்ளன. மணிக்கு 100 கிலோமீட்டர் வேகத்தில் இது உருளும் என்று நம்பப்பட்டாலும், அறிவியல்பூர்வமாக இப்படி ஒரு பாம்பு உலகிலேயே இல்லை. இது முற்றிலும் ஒரு கற்பனையான கதை

கோப்ளின் சுறா (Goblin Shark) – உண்மை:

ஆழ்கடலில் வாழும் ஒரு விசித்திரமான சுறா இனம் இது. இதன் மூக்கு நீளமாகவும், வாய் ஒரு கவண் (Catapult) போல முன்னோக்கிப் பாய்ந்து இரையைப் பிடிக்கும் தன்மையும் கொண்டது. ஜப்பானிய மீனவர்களால் முதன்முதலில் அடையாளம் காணப்பட்ட இது இன்றும் ஆழ்கடலில் வாழும் ஒரு உண்மையான உயிரினம்.

துர்நாற்றப் பறவை (Stinkbird) – உண்மை:

தென் அமெரிக்காவின் அமேசான் காடுகளில் வாழும் இந்தப் பறவைக்கு ‘ஹோட்சின்’ (Hoatzin) என்று பெயர். இது மாடுகளைப் போல இலைகளைத் தின்று செரிமானம் செய்வதால், இதன் உடலில் இருந்து ஒருவித மோசமான வாசனை வரும். இது டைனோசர் காலத்துப் பறவைகளைப் போல அதன் இறக்கைகளில் நகங்களைக் கொண்டுள்ளது. இது இன்றும் காடுகளில் வாழும் ஒரு உண்மையான பறவை.