இலங்கை அரசியல் வரலாற்றில் ஒரு முக்கிய மைல்கல்லாகப் பார்க்கப்படும் “கிரிஷ் கொடுக்கல் வாங்கல்” வழக்கு, முன்னாள் ஜனாதிபதி மகிந்த ராஜபக்ஷவின் புதல்வரும், நாடாளுமன்ற உறுப்பினருமான நாமல் ராஜபக்ஷவின் அரசியல் வாழ்க்கையில் ஒரு பெரும் கறையாக நீடிக்கிறது.

கிரிஷ் கொடுக்கல் வாங்கல் என்றால் என்ன?

இந்தியாவைச் சேர்ந்த கிரிஷ் (Krrish Group) என்ற கட்டுமான நிறுவனம், கொழும்பு கோட்டை பகுதியில் உள்ள பெறுமதிமிக்க நிலத்தில் ஒரு பாரிய அடுக்குமாடி மற்றும் வர்த்தக வளாகத்தை அமைப்பதற்காக இலங்கை அரசாங்கத்துடன் ஒப்பந்தம் செய்தது. இந்தத் திட்டத்தின் ஒரு பகுதியாக, இலங்கையில் ரக்பி விளையாட்டை மேம்படுத்துவதாகக் கூறி, குறிப்பிட்ட ஒரு தொகை கைமாறியதாகக் கூறப்படுகிறது.

இதில் எப்படி ஊழல் நடந்தது?

குற்றச்சாட்டுகளின்படி, கிரிஷ் நிறுவனம் ரக்பி விளையாட்டு மேம்பாட்டிற்காக வழங்கிய 70 மில்லியன் ரூபாயை, நாமல் ராஜபக்ச தனக்குச் சொந்தமான அல்லது தனது கட்டுப்பாட்டில் உள்ள நிறுவனம் (NR Consultancies) ஊடாகப் பெற்றுக் கொண்டு, அதனைத் தனிப்பட்ட தேவைகளுக்காகப் பயன்படுத்தியதாகக் கூறப்படுகிறது. இது பணச் சலவை (Money Laundering) மற்றும் பொதுச் சொத்தைத் தவறாகப் பயன்படுத்தியதன் கீழ் வருகிறது.

பின்னணியும் விசாரணைத் தகவல்களும்

இந்த முறைகேடு 2012 மற்றும் 2013 ஆம் ஆண்டுகளுக்கு இடைப்பட்ட காலப்பகுதியில் நடைபெற்றதாகக் கூறப்படுகிறது. விசாரணைகளின்படி:

• கிரிஷ் நிறுவனத்தின் பணிப்பாளர் ஒருவரிடம் நாமல் ராஜபக்ஷ நிதி உதவி கோரியுள்ளார்.
• குறித்த தொகை இரண்டு தவணைகளாக நிமல் பெரேரா என்பவருக்குச் சொந்தமான வங்கிக் கணக்குகளில் வைப்பிலிடப்பட்டுள்ளது.
• பின்னர் அந்தப் பணம் நாமல் ராஜபக்ஷவின் கட்டுப்பாட்டில் இருந்த நிறுவனங்களுக்கு மாற்றப்பட்டதாக நிதிக் குற்றப் புலனாய்வுப் பிரிவு (FCID) நீதிமன்றத்தில் தெரிவித்தது.

அது எப்படி வெளிச்சத்துக்கு வந்தது?

2015ஆம் ஆண்டு ஆட்சி மாற்றத்திற்குப் பிறகு, நிதி மோசடி விசாரணைப் பிரிவு (FCID) மேற்கொண்ட விசாரணைகளில் இந்த வங்கிப் பரிமாற்றங்கள் கண்டறியப்பட்டன. முறையான கணக்கு வழக்குகளின்றி ஒரு தனியார் நிறுவனத்திடமிருந்து அரசியல்வாதி ஒருவர் பெருந்தொகையைப் பெற்றதே சந்தேகத்தை உறுதிப்படுத்தியது.

2015ஆம் ஆண்டு ஆட்சி மாற்றத்தின் பின்னர் இந்த விவகாரம் வெளிச்சத்துக்கு வந்தது. 2016ஆம் ஆண்டு இது தொடர்பாக நாமல் ராஜபக்ஷ கைது செய்யப்பட்டு பின்னர் பிணையில் விடுவிக்கப்பட்டார். நீண்ட கால இழுபறிக்குப் பின்னர், 2025 ஜனவரி 28 அன்று சட்டமா அதிபரினால் அவருக்கு எதிராக கொழும்பு மேல் நீதிமன்றத்தில் உத்தியோகபூர்வமாகக் குற்றப்பத்திரிகை தாக்கல் செய்யப்பட்டது.

இதில் பிரதானமாக பணச் சலவை தடுப்புச் சட்டம் மற்றும் நம்பிக்கைப் பொறுப்பை மீறுதல் ஆகிய குற்றச்சாட்டுகள் சுமத்தப்பட்டுள்ளன. இருப்பினும், இந்தக் குற்றச்சாட்டுகள் அரசியல் உள்நோக்கம் கொண்டவை என்றும், அரசாங்கம் தனது தோல்விகளை மறைக்க எடுக்கும் முயற்சி என்றும் நாமல் ராஜபக்ஷ தரப்பு தொடர்ந்து மறுத்து வருகிறது.

குற்றம் நிரூபணமானால் நாமல் ராஜபக்சவுக்கு என்ன தண்டனை வழங்கப்படும்?

பணச் சலவை தடுப்புச் சட்டத்தின் கீழ் (Prevention of Money Laundering Act) குற்றம் நிரூபிக்கப்பட்டால்:

• குறைந்தது 5 ஆண்டுகள் முதல் 20 ஆண்டுகள் வரை சிறைத்தண்டனை விதிக்கப்படலாம்.
• மோசடி செய்யப்பட்ட தொகையைப் போல மூன்று மடங்கு வரை அபராதம் விதிக்கப்படலாம்.
• அவரது நாடாளுமன்ற உறுப்பினர் பதவியும் பறிபோகும் அபாயம் உள்ளது.

இப்போது இந்த வழக்கின் நிலை என்ன?

கொழும்பு மேல் நீதிமன்றம் இந்த வழக்கினை வரும் 19ஆம் திகதி வரை ஒத்திவைத்துள்ளது. வழக்கறிஞர்களின் பணிப்புறக்கணிப்பால் விசாரணை தடைப்பட்டுள்ளது. தற்போது இந்த வழக்கு ஒரு இழுபறி நிலையிலேயே தொடர்கிறது.