ராஜஸ்தான் மாநிலம் ஜலோர் மாவட்டத்தில் உள்ள காசிபூர் கிராமத்தில், பெண்கள் மற்றும் புதுமணப் பெண்கள் ஸ்மார்ட்போன் பயன்படுத்துவதற்குப் பஞ்சாயத்து தடை விதித்த சம்பவம் பெரும் பரபரப்பை ஏற்படுத்தியது. சவுத்ரி சமூகத்தைச் சேர்ந்த 15 கிராமங்களின் பெரியவர்கள் கலந்துகொண்ட கூட்டத்தில் இம்முடிவு எடுக்கப்பட்டது. இளைய தலைமுறையினர் ஸ்மார்ட்போன்களைத் தவறாகப் பயன்படுத்துவதிலிருந்து பாதுகாப்பதே இதன் நோக்கம் என்று பஞ்சாயத்துத் தலைவர் சுஜ்னாராம் சவுத்ரி தெரிவித்தார்.
இந்தத் தடையின்படி, பெண்கள் மற்றவர்களுடன் பேசுவதற்குப் பழைய விசைப்பலகை (Keypad) போன்களை மட்டுமே பயன்படுத்த வேண்டும் என்றும், பள்ளி செல்லும் பெண்களுக்குப் படிப்புக்குத் தேவைப்பட்டால் மட்டும் வீட்டில் வைத்துப் பயன்படுத்த அனுமதிக்கலாம் என்றும் கூறப்பட்டது. இருப்பினும், இந்த விவகாரம் சமூக ஊடகங்களில் வைரலாகி கடும் விமர்சனங்களுக்கு உள்ளானதைத் தொடர்ந்து, ஸ்மார்ட்போன் பயன்படுத்துவதற்கான தடை தற்போது திரும்பப் பெறப்பட்டுள்ளது.
