பிரிட்டனின் மிகப் பெரிய குழந்தைகளுக்கான தனியார் மருத்துவமனையான லண்டன் போர்ட்லேண்ட் மருத்துவமனையில் (Portland Hospital) ஏழு வயது சிறுவன் ஜேம்ஸ் உயிரிழந்தது தொடர்பாக, அனுராதா பூபதிராஜு என்ற மூத்த தாதி மீது கவனக்குறைவால் கொலை செய்ததாக நீதிமன்றத்தில் வழக்குத் தொடரப்பட்டுள்ளது.
சிறுவன் ஜேம்ஸ் ஆரோக்கியமான மற்றும் மகிழ்ச்சியான குழந்தை என்றாலும், தூங்கும்போது சுவாசம் நின்றுவிடும் அபாயம் உட்பட சில முக்கியமான உடல்நலப் பிரச்சினைகளைக் கொண்டிருந்தார். அவருக்கு வழக்கமான குடல் அறுவை சிகிச்சை ஆகஸ்ட் 25, 2016 அன்று வெற்றிகரமாக நடைபெற்றது. அன்று இரவு அவர் தீவிர சிகிச்சைப் பிரிவில் (ICU) தங்கவைக்கப்பட்டிருந்தார்.
தாதி அனுராதா பூபதிராஜு பணியில் இருந்தபோது, ஜேம்ஸ் தனது கண்காணிப்பு வயர்களை இழுத்ததால், ஒரு இளைய தாதி அந்தக் கருவிகளைத் தற்காலிகமாக அகற்றியிருந்தார். அதிகாலை 2:10 மணியளவில் அனுராதா ஜேம்ஸைப் பொறுப்பேற்றார். ஜேம்ஸ் சுமார் 40 நிமிடங்களுக்குப் பிறகு மீண்டும் தூங்கத் தொடங்கினார். அப்போது, ஜேம்ஸின் நிலையைப் பற்றி தாதிக்குத் தெரியும் என்பதால், தூங்கத் தொடங்கியவுடன் அனுராதா அந்தக் கண்காணிப்புக் கருவிகளை மீண்டும் இணைத்திருக்க வேண்டும். ஆனால், அவர் அதைச் செய்யவில்லை. ஒரு மணி நேரத்திற்கும் மேலாக, அந்தக் கருவிகளை இணைக்காமல், ஜேம்ஸை அவர் படுக்கையில் தூங்க விட்டுள்ளார். “இது மிக மோசமான மற்றும் ஆபத்தான தவறு” என்று வழக்குத் தொடுக்கும் சட்டத்தரணி நீதிமன்றத்தில் தெரிவித்தார்.
அதிகாலை 4 மணியளவில் இளைய தாதி திரும்பியபோது, கண்காணிப்புக் கருவிகள் இணைக்கப்படவில்லை என்பதைக் கண்டு அவரே இணைக்க முயற்சித்துள்ளார். ஆனால், கருவிகளில் எந்த சமிக்ஞையும் வரவில்லை. இறுதியில், ஜேம்ஸுக்கு சுவாசமும் இதயத் துடிப்பும் நின்றுவிட்டது என்பதை அவர் அதிர்ச்சியுடன் உணர்ந்துள்ளார். உடனடியாகச் சிகிச்சையளித்தாலும், அதிக நேரம் ஆக்ஸிஜன் கிடைக்காமல் இருந்ததால், ஜேம்ஸுக்கு மீளமுடியாத மூளை பாதிப்பு ஏற்பட்டது. அதனால், அடுத்த நாள் அவர் உயிரிழந்தார். தாதியின் இந்தச் “சாதாரணக் கடமையில் ஏற்பட்ட மிகப் பெரிய கவனக்குறைவுதான்” ஜேம்ஸின் மரணத்திற்குக் காரணம் என்று அரசுத் தரப்பு வாதிடுகிறது. தாதி அனுராதா பூபதிராஜு, தாம் கவனக்குறைவால் கொலை செய்ததாகக் கூறப்படும் குற்றச்சாட்டுகளை மறுத்துள்ளார். அவருக்கு ஜேம்ஸின் உடல்நிலை குறித்து “வரையறுக்கப்பட்ட தகவல்கள்” மட்டுமே வழங்கப்பட்டதால், அவர் இருந்த ஆபத்தான நிலையைத் தான் உணரவில்லை என்று அவர் நீதிமன்றத்தில் வாதிட்டுள்ளார். இந்த வழக்கு விசாரணை தொடர்கிறது.
