வரலாற்றுச் சிறப்புமிக்க நல்லூர் கந்தசுவாமி ஆலயத்தின் வருடாந்த மகோற்சவ பெருந்திருவிழா எதிர்வரும் ஜூலை 29ஆம் திகதி செவ்வாய்க்கிழமை கொடியேற்றம் மூலம் ஆரம்பமாகவுள்ளது. இதனை முன்னிட்டு, கொடிச்சீலை வடிவமைப்பாளர்களிடம் காளாஞ்சி மற்றும் பத்திரிகை கையளிக்கும் நிகழ்வு இன்று திங்கட்கிழமை காலை பாரம்பரிய முறைப்படி நடைபெற்றது.
வள்ளியம்மை திருக்கல்யாணப் படிப்புடன் பந்தற்கால் நாட்டுதல் நடைபெறும் இந்நிகழ்வில், ஒற்றை திருக்கை மாட்டுவண்டி மூலம் நல்லூரிலிருந்து கல்வியங்காடில் வசிக்கும் கொடிச்சீலை வடிவமைப்பாளர்களிடம் கொடிச்சீலை வழங்கும் மரபுடையவர்களுக்கான காளாஞ்சி எடுத்துச் செல்லப்பட்டது.
இதன்போது, மகோற்சவ திருவிழா தொடர்பான பத்திரிகையும் காளாஞ்சியும் வழங்கப்பட்டன. இந்த நிகழ்வு நல்லூர் பெருந்திருவிழாவின் பண்பாட்டு மரபுகளையும், இன்றும் அசைக்க முடியாத முறையில் தொடரும் பொதுமக்களின் ஆன்மிகப் பற்றையும் பிரதிபலிக்கிறது.
25 நாட்கள் மகோற்சவ நிகழ்வுகள் – முக்கிய தினங்கள்
நல்லூர் பெருந்திருவிழா 25 நாட்கள் கொண்டாடப்படவிருக்கின்றது. அவ்வகையில், முக்கிய திருவிழாக்கள் பின்வருமாறு நடைபெறவுள்ளன:
- 🔸 10ஆம் திருவிழா – மஞ்சத் திருவிழா: ஆகஸ்ட் 07
- 🔸 22ஆம் திருவிழா – மாம்பழத் திருவிழா: ஆகஸ்ட் 19
- 🔸 24ஆம் திருவிழா – தேர் திருவிழா: ஆகஸ்ட் 21 காலை
- 🔸 25ஆம் திருவிழா – தீர்த்த திருவிழா மற்றும் கொடியிறக்கம்: ஆகஸ்ட் 22 காலை
இந்த ஆண்டும், யாழ். நல்லூர் ஆலய பெருந்திருவிழாவிற்காக அனைத்து ஏற்பாடுகளும் துல்லியமாக நடைபெறுவதாக ஆலய நிர்வாகம் தெரிவித்துள்ளது. இலங்கை மற்றும் வெளிநாடுகளிலிருந்து பல்லாயிரக்கணக்கான பக்தர்கள் இந்த விழாவில் கலந்துகொள்வார்கள் என எதிர்பார்க்கப்படுகிறது.
