மாவீரர் வாரம் நடைபெற்றுவரும் நிலையில், தமிழீழ விடுதலைப் புலிகளின் தலைவர் வேலுப்பிள்ளை பிரபாகரனின் 71வது பிறந்தநாள் இன்றைய தினம் (புதன்கிழமை) மற்றும் மாவீரர் நாள் நாளை (வியாழக்கிழமை) அனுஷ்டிக்கப்படவுள்ள சூழலில், யாழ்ப்பாணத்தில் பொலிஸாரின் கெடுபிடிகள் தீவிரமடைந்துள்ளன.
வல்வெட்டித்துறையில் விசாரணைகள்: “பாதணி” குறித்த அச்சுறுத்தல்
வல்வெட்டித்துறை பகுதியில் மாவீரர் தினத்தை அனுஷ்டிக்கும் வகையில் அதற்கான அலங்கரிப்புப் பணியில் ஈடுபட்டவர்களை அச்சுறுத்தும் வகையில் வல்வெட்டித்துறை பொலிஸார் தீவிர விசாரணைகளை மேற்கொண்டுள்ளனர்.
- தமிழீழ விடுதலைப் புலிகள் இயக்கத்தைச் சேர்ந்த சிலரின் சிவில் உடை படங்களுடன் வல்வெட்டித்துறையில் கட்டப்பட்ட பதாகையை உடனடியாக அகற்ற வேண்டும் என வல்வெட்டித்துறை பொலிஸார் உத்தரவிட்டுள்ளனர்.
- குறித்த பதாகையில் உள்ள பாதணி, விடுதலைப் புலிகளை உருவகப்படுத்துவதாகச் சுட்டிக்காட்டி, அது தொடர்பிலும் சிலரிடம் பொலிஸார் விசாரணைகளை நடத்தியுள்ளனர்.
மல்லாகத்தில் ஒலிபரப்பு சாதனங்கள் பறிமுதல்
இதேவேளை, நேற்றைய தினம் (செவ்வாய்க்கிழமை) மாலை மல்லாகம் சந்தி பகுதியில் மாவீரர் நினைவேந்தல் தொடர்பில் பாடல் ஒலிக்கவிடப்பட்டுள்ளது.
- சம்பவ இடத்திற்கு விரைந்து வந்த தெல்லிப்பழை பொலிஸார், குறித்த ஒலிபரப்புச் சாதனங்களை பறிமுதல் செய்து, பொலிஸ் நிலையம் கொண்டு சென்றுள்ளனர்.
- பறிமுதல் செய்யப்பட்ட சாதனங்கள் சான்றுப் பொருளாக இலக்கமிடப்பட்டு வைக்கப்பட்டுள்ளன.
ஆட்சி மாறினாலும் அச்சுறுத்தல் தொடர்கிறது!
மாவீரர் நாள் நாளை வியாழக்கிழமை அனுஷ்டிக்கப்படவுள்ள நிலையில் பொலிஸாரின் கெடுபிடிகள் இவ்வாறு அதிகரித்துள்ளமை குறித்து பொதுமக்கள் மத்தியில் விசனம் ஏற்பட்டுள்ளது. “ஆட்சி மாறினாலும், பழையவாறே அச்சுறுத்தல்களும், கெடுபிடிகளும் தொடர்ந்து கொண்டிருக்கின்றன” என அவர்கள் கவலை தெரிவிக்கின்றனர்.
