அவுஸ்திரேலியாவின் போண்டி பீச் பகுதியில் நடத்தப்பட்ட பயங்கரவாதத் தாக்குதலில் உயிரிழந்தவர்களுக்கு அஞ்சலி செலுத்தும் பிரேரணை அந்நாட்டு நாடாளுமன்றத்தில் சமர்ப்பிக்கப்பட்டது. இதன்போது உரையாற்றிய பிரதமர் அந்தோனி அல்பானிஸ், இந்தத் தாக்குதலை “ஐஎஸ் (ISIS) அமைப்பால் தூண்டப்பட்ட ஒரு செயல்” என்றும் “இஸ்லாத்தின் பெயரால் செய்யப்பட்ட ஒரு விபரீதம்” என்றும் வர்ணித்தாரே ஒழிய, இஸ்லாமியத் தீவிரவாதம்’ (Radical Islamist Extremism) என்ற நேரடியான சொற்பிரயோகத்தைப் பயன்படுத்துவதைத் தவிர்த்துக் கொண்டார். அரசாங்கத்தின் இந்த மென்மையான போக்கு, அவுஸ்திரேலிய மக்களிடையே கடும் அதிருப்தியை ஏற்படுத்தியுள்ளதாக அண்மைய கருத்துக் கணிப்புகள் தெரிவிக்கின்றன.
பிரதமரின் இந்த நிலைப்பாட்டை எதிர்க்கட்சித் தலைவி சூசன் லே (Sussan Ley) கடுமையாகச் சாடியுள்ளார். நாடாளுமன்றத்தில் உரையாற்றிய அவர், “தீவிரவாத இஸ்லாமியத் தீவிரவாதமே இதற்குத் தெளிவான காரணம், அதனை அப்படியே அழைக்க நாம் அஞ்சக் கூடாது” என்று பகிரங்கமாகத் தெரிவித்தார். மேலும், இந்தத் தாக்குதல் தொடர்பாக ஒரு அரச ஆணைக்குழுவை (Royal Commission) அமைப்பதற்கு அரசாங்கம் ஏன் இவ்வளவு காலம் தாமதித்தது என்பதற்கு பிரதமர் மன்னிப்புக் கேட்க வேண்டும் என்றும் அவர் வலியுறுத்தினார்.
இதேவேளை, தேசியக் கட்சியின் தலைவர் டேவிட் லிட்டில்ப்ரூட் மற்றும் பல கூட்டணி உறுப்பினர்களும் இத்தாக்குதலை நடத்தியவர்களை “இஸ்லாமியப் பயங்கரவாதிகள்” என்று வெளிப்படையாகச் சாடினர். “தீவிரவாத இஸ்லாம் ஒழிக்கப்பட வேண்டும்” என அவர்கள் ஆவேசமாக உரையாற்றினர். ஆளுங்கட்சியின் இந்த ‘வார்த்தை விளையாட்டு’ ஒருபுறமிருக்க, வெறுப்புப் பேச்சுக்களைக் கட்டுப்படுத்துவது மற்றும் துப்பாக்கிக் கட்டுப்பாட்டுச் சட்டங்களில் திருத்தம் கொண்டு வருவது தொடர்பான புதிய சட்டமூலங்கள் நாளை நாடாளுமன்றத்தில் விவாதத்திற்கு எடுத்துக்கொள்ளப்படவுள்ளன. இருப்பினும், பயங்கரவாதத்தின் பின்னணியைத் தெளிவாகப் பெயரிடுவதில் ஏற்பட்டுள்ள இந்த அரசியல் பிளவு, அவுஸ்திரேலிய அரசியலில் பெரும் பரபரப்பை ஏற்படுத்தியுள்ளது.
