பேரிடர் காலத்தில் வெள்ளத்தால் பாதிக்கப்பட்ட தமது வீட்டிற்கு அரசாங்கத்தால் வழங்கப்படும் 25 ஆயிரம் ரூபாய் நிதி உதவியை வழங்க மறுத்த கிராம சேவையாளருக்கு எதிராக, பாதிக்கப்பட்ட மாணவன் ஒருவர் மனித உரிமைகள் ஆணைக்குழுவின் யாழ். பிராந்திய காரியாலயத்தில் முறைப்பாடு செய்துள்ளார்.

சண்டிலிப்பாய் பிரதேச செயலகத்திற்கு உட்பட்ட கல்லுண்டாய் பகுதியில் இந்தச் சம்பவம் பதிவாகியுள்ளது.

சம்பவம் தொடர்பில் முறைப்பாட்டாளரின் தரப்பு:

• முறைப்பாட்டாளர்: சண்டிலிப்பாய், கல்லுண்டாய் புதிய வீட்டுத் திட்டத்தில் வசிக்கும் 16 வயது மாணவன்.
• குடும்பப் பின்னணி: தந்தை இல்லாத நிலையில், தாயுடன் வசித்து வந்த இவர், கடந்த மூன்று மாதங்களாக தாயார் வேலை நிமித்தமாக கொழும்பில் தங்கியுள்ளதால், இரவு நேரங்களில் குருநகரில் உள்ள தனது பெரியம்மா வீட்டில் தங்கி வந்துள்ளார்.
• பிரச்சினையின் ஆரம்பம்: அப்பகுதியில் மழை ஆரம்பித்தால், இவர்களின் வீடு வெள்ளத்தில் மூழ்குவது வழமை. இந்த முறையும் வெள்ளம் ஏற்பட்டதால், அவர் பெரியம்மா வீட்டிலேயே தங்கியிருந்தார். வெள்ளம் இவர்களின் வீட்டினுள் சென்று பாதிப்பை ஏற்படுத்தியுள்ளது.
• நிவாரணம் மறுக்கப்பட்டமை: வெள்ளத்தால் பாதிக்கப்பட்டமைக்கான அரசாங்கத்தின் 25 ஆயிரம் ரூபாய் நிதியுதவியைப் பெறுவதற்காக, தமது பகுதி கிராம சேவையாளரிடம் பதிவுகளை மேற்கொள்ளச் சென்றபோது, “வெள்ளம் ஏற்பட்டபோது வீட்டில் எவரும் வசிக்கவில்லை” எனக் கூறி கிராம சேவையாளர் பதிவேடுகளை ஏற்க மறுத்துள்ளார்.

மாணவனின் குற்றச்சாட்டு:

பாதிக்கப்பட்ட மாணவன் மனித உரிமை ஆணைக்குழுவில் தெரிவித்ததாவது:

“வெள்ளம் வருவதற்குச் சில நாட்களுக்கு முன்னரே எமது அயலவர்கள் சிலரும் அங்கிருந்து வெளியேறி உறவினர்கள் வீடுகளில் தங்கியிருந்தனர். ஆனால், அவர்களுக்கு நிதி உதவி வழங்கப்பட்டுள்ளது. எமது குடும்பத்தை மாத்திரமே கிராம சேவையாளர் திட்டமிட்டுப் புறக்கணித்துள்ளார். அம்மா மேலதிகாரிகளுடன் பேசியபோதும், வீட்டில் வசிக்கவில்லை எனக் கூறி நிதியுதவி தரவில்லை. எமக்கு அந்த நிதியுதவியை பெற்றுத்தர நடவடிக்கை எடுக்க வேண்டும் என்பதற்காகவே மனித உரிமை ஆணைக்குழுவில் முறைப்பாடு செய்துள்ளேன்.”

பேரிடரால் பாதிக்கப்பட்ட குடும்பங்களுக்கு நியாயமான நிவாரணம் வழங்கப்பட வேண்டும் என்ற கோரிக்கையை முன்வைத்து மாணவன் இந்த நடவடிக்கையை எடுத்துள்ளமை குறிப்பிடத்தக்கது.