சென்னை மற்றும் அதன் புறநகர் பகுதிகளில் கடும் வெயிலால் வாடி வந்த மக்களுக்கு, இன்று மாலை திடீரெனவே வானிலை மாற்றம் ஏற்பட்டது. மாலை 3.30 மணியளவில், வானம் இருண்டு, பலத்த காற்றுடன் மழை பெய்ய ஆரம்பித்தது.
இதன் காரணமாக, சென்னை விமான நிலையத்தில் விமான சேவைகள் கடுமையாக பாதிக்கப்பட்டன. தரையிறங்க தயாராக இருந்த பல விமானங்கள், வானில் வட்டமடித்து சுழன்றும் பறந்தன. குறிப்பாக சிங்கப்பூர், மதுரை, திருச்சி, கோவை, பெங்களூரு மற்றும் சூரத் ஆகிய நகரங்களிலிருந்து வந்த விமானங்கள், தற்காலிகமாக தரையிறங்க முடியாமல் தள்ளிப் போயின.
வானிலை திடீரென மோசமாகியதால் விமான நிலையத்தில் விமானங்கள் லேட்டாக ஒதுக்கி வைக்கப்பட்டுள்ளன. எனவே பயணிகளுக்கு சற்று அவசரநிலை ஏற்பட்டது. விமான நிலையத்தில் பரபரப்பு நிலவியதை தொடர்ந்து அதிகாரிகள் அவசர நடவடிக்கைகளை மேற்கொண்டு விமான போக்குவரத்தைக் கண்காணித்து வருகின்றனர்.
வானிலை அதிகாரிகள் தெரிவித்துள்ளதாவது, “தொடர்ந்த வெப்ப அலை காரணமாக, ஈரப்பதம் அதிகரித்து, மேகக் கூட்டம் உருவாகி இடி மின்னலுடன் கூடிய மழை பெய்தது. இது இயல்பான வானிலை மாற்றம்தான்; ஆனால் சுழற்சி காற்றுகள் மற்றும் திடீர் மழை விமான இயக்கத்தில் தடை ஏற்படுத்தும்” என்றனர்.
சென்னைவாசிகளுக்கு வெயிலின் தாக்கத்திலிருந்து தற்காலிக நிவாரணமாக இந்த மழை இருந்தாலும், விமான பயணிகள் மற்றும் விமான நிலையத்திற்குப் பெரும் சவாலாக அமைந்துள்ளது.
